Հայոց ցեղասպանության թանգարան-ինստիտուտն իր գործունեության ընթացքում առաջին անգամ կազմակերպել է Հոլոքոստի հիշողության շաբաթ՝ նվիրված Աուշվից-Բիրկենաու համակենտրոնացման ճամբարի ազատագրման և Երկրորդ համաշխարհային պատերազմի ավարտի 75-ամյակին:
Այսօր ՀՑԹԻ գիտաժողովների սրահում տեղի ունեցավ առաջին հանդիպումը:
Միջոցառմանը բացման խոսքով հանդես եկավ ՀՑԹԻ տնօրեն Հարություն Մարությանը.
«Հունվարի 24-ին մենք Հոլոքոստի և Ցեղասպանության զոհերի հուշարձանի մոտ ներկա գտնվեցինք կազմակերպված միջոցառմանը, որտեղ հարգանքի տուրք մատուցեցինք Հոլոքոստի զոհ դարձած հրեաների հիշատակին: Առաջիկայում կփորձենք այս հիշողության օրերն ու շաբաթներն ուղեկցել նաև ժամանակավոր ցուցադրություններով»:
Հարություն Մարությանը ներկաների համար ընթերցեց
ՀՀ նախագահ Արմեն Սարգսյանի ողջույնի խոսքն ուղղված հավաքի կազմակերպիչներին ու մասնակիցներին:
«Մեզ՝ հայերիս և հրեաների վրա պատմական առաքելություն և պատասխանատվություն է դրված. հավերժացնել մարդկության դեմ կատարված մեծագույն հանցագործությունների՝ Հայոց ցեղասպանության և Հոլոքոսթի զոհերի հիշատակը և մարդկության մեջ մշտապես վառ պահել հիշողությունն այդ մասին՝ որպես դաս, որպես հիշեցում, որպես կանխարգելում։
Մեր հիշողությունից չպետք է անհետանա ոչ Աուշվից-Բիրկենաուի ողբերգությունը, ոչ էլ այն ազատագրողների հերոսությունը։
Ողջունում եմ Հայոց ցեղասպանության թանգարան-ինստիտուտի այս նախաձեռնությունը և հաջողություն մաղթում «Հոլոքոստի հիշողության շաբաթվա» անցկացմանը», - ասված էր նախագահի ուղերձում։
Այնուհետև ելույթ ունեցան ՀՑԹԻ Վահագն Դադրյանի անվան համեմատական ցեղասպանագիտության բաժնի վարիչ, պատմ. գիտ. թեկն. Սուրեն Մանուկյանը «Հոլոքոստի հիշատակի օրվա խորհուրդը», Հայաստանի հրեական համայնքի ղեկավար Ռիմա Վարժապետյան-Ֆելերը «Աուշվիցյան տպավորություններ. 2020 թ. հունվարի 27-ին Աուշվիցում կայացած միջոցառումների ներկայացում» և պատմ. գիտ. դոկտ. Հարություն Մարությանը «Հայոց ցեղասպանության և Հրեից հոլոքոստի հիշողության կառուցվածքային առանձնահատկությունները» թեմաներով:
Միջոցառմանը ներկա էին նաև ՀՀ նախագահի խորհրդական Համլետ Գասպարյանը, ՀՀ-ում Լեհաստանի արտակարգ ու լիազոր դեսպան Պավել Չեպլակը, ՀՀ-ում Ավստրիայի արտակարգ ու լիազոր դեսպան Ալոիս Կրաուտը (նստավայրը Ավստրիա), ինչպես նաև հետազոտողներ, լրագրողներ, ուսանողներ:
Հիշեցնենք, որ հաջորդ հանդիպումը տեղի կունենա հունվարի 31-ին, ժամը 11-ին, ՀՑԹԻ գիտաժողովների սրահում: Ելույթ կունենա ԵՊՀ պատմության ֆակուլտետ, հայոց պատմության ամբիոն, պատմ. գիտ. դոկտոր, պրոֆեսոր Աշոտ Հայրունին «Հրեաների զանգվածային բնաջնջման նախապատրաստումն ու իրականացումը հիտլերյան վարչակարգի կողմից» թեմայով:
