2020 թ. ապրիլի 29-ին հեռավար կարգով տեղի է ունեցել «Հայոց ցեղասպանության թանգարան-ինստիտուտ» հիմնադրամի հոգաբարձուների խորհրդի հերթական նիստը։ Նիստին մասնակցել են հիմնադրամի հոգաբարձուների խորհրդի անդամներ՝ Հովհաննես Հովհաննիսյանը, Վահրամ Տեր-Մաթևոսյանը, Աշոտ Մելքոնյանը, Ռուբեն Մելքոնյանը, Վազգեն Յակուբյանը, Հրանուշ Խառատյանը, Ռուբեն Սաֆրաստյանը, Վլադիմիր Վարդանյանը, Անի Ավագյանը։ Նիստին մասնակցում էր հիմնադրամի տնօրեն Հարություն Մարությանը։ Նիստը վարում էր խորհրդի նախագահ Ռայմոնդ Գևորգյանը, ում առաջարկով նիստին ներկա էին նաև ՀՑԹԻ գիտական աշխատանքների գծով փոխտնօրեն Էդիտա Գզոյանը և գիտքարտուղար Նարինե Մարգարյանը։
Հիմնադրամի տնօրեն Հարություն Մարությանը ներկայացրեց 2019 թ. գործունեության արդյունքները և ֆինանսական տարվա հաշվետվությունը, որն ընդունվեց հոգաբարձուների խորհրդի կողմից։ Քննարկվեցին 2020 թ. ընթացիկ ծրագրերը, ինչպես նաև ծրագրային որոշ փոփոխություններ, որոնք կապված են համավարակով պայմանավորված արտակարգ իրավիճակի հետ։ Նշվեց, որ ապրիլին կայանալիք «Կիլիկիան և կիլիկիահայությունը Հայոց ցեղասպանության տարիներին», ինչպես նաև «Երեխաները և ազգը. երեխաների բռնի տեղափոխումը և Ցեղասպանության կոնվենցիան պատմության և արդիականության լույսի ներքո» միջազգային գիտաժողովները հետաձգվել են։ Ապրիլ 24-ին ընդառաջ թանգարան-ինստիտուտը նախատեսված ժամանակավոր ցուցադրությունը ներկայացրել է առցանց՝ «Ինքնապաշտպանական մարտերը Կիլիկայում Հայոց ցեղասպանության տարիներին. նվիրված Մարաշի, Հաճընի, Այնթապի ինքնապաշտպանությունների 100-ամյա տարելիցին» խորագրով։
Առաջարկվեց, որ արտակարգ իրավիճակում ՀՑԹԻ-ն շարունակի առաջնահերթություն տալ առցանց հարթակում առավել ակտիվություն ցուցաբերելուն և համացանցի հնարավորությունները հնարավորինս արդյունավետ օգտագործելուն։
Հոգաբարձուների խորհուրդն անդրադարձավ Ծիծեռնակաբերդի հուշայգու ստեղծման ուղղությամբ վերջին զարգացումներին։ Հաշվի առնելով, որ այս հարցը քննարկվել էր նաև նախորդ նիստի ժամանակ ու արդեն որոշ առաջարկներ եղել էին, ուստի և նշվեց, որ անհրաժեշտություն կա հարցի կոնցեպտուալ ու կառուցվածքային առաջարկությունների փաթեթը համալրելու։ Ծիծեռնակաբերդի հուշայգու նախագիծը՝ Արևմտյան Հայաստանի, Կիլիկիայի և Օսմանյան կայսրության հայաբնակ այլ շրջանների անունները կրող պուրակներով, ճեմուղիներով, արահետներով, այդ տարածաշրջանների պատմության և մշակույթի դրվագներին անդրադարձ կատարող յուրօրինակ փոքր ցուցադրություններով համահայկական բնույթ ունեցող ծրագիր է։ Որոշվեց, որ հետագայում այս հարցի ուղղությամբ շարունակվեն քննարկումների անցկացումը՝ համապատասխան հայտարարություններով հանրությանն իրազեկելով այդ ուղղությամբ տարվող աշխատանքների մասին։
Քննարկվեց նաև թանգարան-ինստիտուտի գիտական ֆոնդերի ու գրադարանի տարանջատման հարցը, այդ ուղղությամբ տարվող աշխատանքները։ Նշվեց, որ այս հարցի արդյունավետ լուծման համար Հիմնադրամը խորհրդակցել է հայաստանյան նմանատիպ կառույցների պատասխանատու անձանց հետ, այդ կապակցությամբ կազմվել է ֆոնդային գնահատող հանձնաժողով և այս գործընթացն իրականացվելու է նրանց համաձայնությամբ և ԿԳՄՍ նախարարության վերահսկողությամբ։ Ընդգծվեց, որ գրադարանի կարգավիճակի փոփոխությունը չի նշանակում, որ այն դառնալու է հանրային գրադարան։ Այն շարունակելու է գործել որպես մասնագիտական գրադարան՝ հետազոտողների համար։ Իսկ ֆոնդային միավորներից հետազոտողները կարող են օգտվել միայն ֆոնդասենյակում՝ ֆոնդապահների ներկայությամբ՝ համաձայն գործող կարգի։
Հոգաբարձուների խորհրդի նիստին քննարկվեցին ՀՑԹԻ գործունեությանն առնչվող մի շարք ընթացիկ այլ հարցեր։