08.04.2026
2026 թվականին լրանում է Հայոց ցեղասպանության տարիներին Սիրիայի և Միջագետքի անապատներ հարկադրաբար տեղահանված հայերի զանգվածային ու կանխամտածված բնաջնջման 110-րդ տարելիցը:
Եփրատի հովտի, Դեր Զորի, Ռաս ուլ-Այնի և հարակից վայրերի անապատային շրջաններում ցեղասպանական գործընթացն ուղեկցվում էր ծայրահեղ դաժանությամբ ու զրկանքներով, որոնց զոհերը հիմնականում տարեցներն էին, կանայք և երեխաները:
Գիտաժողովի նպատակն է վերհանել տեղահանության և կոտորածների «վերջնահանգրվանային» շրջանները՝ որպես Հայոց ցեղասպանության իրագործման քիչ հետազոտված փուլ, և ապահովել դրանց համապարփակ գիտական ներկայացումը:
Ողջունելի են փաստագրական հարուստ հիմք ու հստակ մեթոդաբանություն ունեցող հետազոտությունները: Առաջնահերթությունը կտրվի հետևյալ թեմատիկ ուղղություններին՝
• օրենսդրական հիմքերը,
• քաղաքական որոշումներն ու սպանության հրամանները,
• պետական կառույցների դերակատարությունն ու վարչարարությունը,
• տեղահանության երթուղիների քարտեզագրումը,
• բնաշխարհի գործոնը բնաջնջման գործընթացում,
• գետերը և լեռնային կիրճերը՝ որպես զանգվածային սպանությունների իրագործման վայրեր,
• բնաջնջման եղանակները,
• քաղցը, համաճարակներն ու հյուծումը՝ որպես կանխամտածված բնաջնջման մեթոդ
Գիտաժողովի անցկացման ժամանակը՝ 27-28 նոյեմբերի, 2026 թ.:
Գիտաժողովի անցկացման վայրը՝ Հայոց ցեղասպանության թանգարան-ինստիտուտ, Երևան, Հայաստանի Հանրապետություն
Գիտաժողովի կազմակերպիչ՝ «Հայոց ցեղասպանության թանգարան-ինստիտուտ» հիմնադրամ
Գիտաժողովի աշխատանքային լեզուները՝ հայերեն և անգլերեն
Մասնակցության համար մինչև 2026 թ. հունիսի 30-ը ներառյալ անհրաժեշտ է ուղարկել զեկուցման վերնագիրը և համառոտագիրը (250-300 բառ), ամփոփ ինքնակենսագրություն
agmiconf2026@genocide-museum.am հասցեին:
