17.08.2025
ՀՑԹԻ գիտաշխատող, բ.գ.թ., դոցենտ Էլինա Միրզոյանը և ավագ գիտաշխատող, պ.գ.թ. Թեհմինե Մարտոյանն օգոստոսի 15-ին Գյումրիում մասնակցել են Ազգագրական-բանագիտական հանրապետական 5-րդ գիտաժողովին՝ կազմակերպված ՀՀ ԳԱԱ Շիրակի հայագիտական հետազոտությունների կենտրոնի կողմից:
Էլինա Միրզոյանն իր «Հայոց ցեղասպանությունը վերապրած շատախցի ականատես Սերոբ Քոսյանի անտիպ հուշագրությունը՝ ազգագրական նոր սկզբնաղբյուր» զեկուցման շրջանակում ներկայացրեց ՀՑԹԻ հավաքածուից անտիպ ձեռագիր հուշագրությունը, որը միջգիտակարգային կիրառություն ունեցող ձեռագիր սկզբնաղբյուր է: Զեկուցման ժամանակ ներկա էին նաև հուշագրի ժառանգները, որով վերահաստատվեց նաև այն փաստը, որ նման աշխատանքներն առավել են սերտացնում սերունդների միջև կապը-երկխոսությունը:
Թեհմինե Մարտոյանը «Ցեղասպանություն հյուծման միջոցով. արցախցի կանանց ոչ զինված դիմադրությունը շրջափակման ընթացքում» խորագրով իր զեկուցման շրջանակում անդրադարձավ թիրախավորված խմբին հյուծելու միջոցով ցեղասպանելուն և արցախցի կանանց փորձառությանը շրջափակման ընթացքում: Սննդի ձեռքբերման եղանակները դիտարկելով որպես ոչ զինված դիմադրություն՝ բանախոսը ներկայացրեց կանանց հնարամտությունը, երևակայությունն ու հմտությունները, որոնք մեծապես նպաստել էին սովին դիմակայելու փորձությանը:
