28.04.2026
Հայոց ցեղասպանության թանգարան-ինստիտուտը ուրախությամբ հայտնում է, որ Web of Science գիտատեղեկատվական շտեմարանի կողմից ինդեքսավորված միջազգային L’Harmattan հրատարակչության և Leipziger Univerrsitätsverlag GmBH -ի կողմից տպագրվել է Capturing Eternity: Jerusalem Armenian Entanglements with Photography (eds. Karen Jallatyan, Diana Ghazaryan in cooperation with Bálint Kovács) հատորը, որտեղ տեղ է գտել ՀՑԹԻ-ի գիտաշխատող դոկտոր Արման Խաչատրյանի հեղինակած գլուխը` “Fostering Resilience through Education: The Mission of the Srp'ots' Zharankavorats' Seminary of the Armenian Patriarchate of Jerusalem” վերնագրով։
Հոդվածում հեղինակը անդրադառնում է 19-րդ դարի կեսերին Երուսաղեմի Հայոց պատրիարքության Սրբոց Ժառանգավորաց ճեմարանի հիմնադրմանը և դրա նշանակությանը հոգևորականության նոր և առաջադեմ սերունդներ պատրաստելու գործում։ Ճեմարանը, ունենալով ժամանակի համար առաջադեմ ուսումնական ծրագիր, դարձավ ոչ միայն հոգևոր կրթության կենտրոն, այլև դրա շուրջ ձևավորվեց պատրիարքության գիտակրթական միջավայրը տպարանի, գրադարանի, թանգարանի, «Սիոն» պարբերականի, իսկ հետագայում նաև Երուսաղեմի հայ քաղաքաբնակ երեխաների համար ստեղծված դպրոցի հիմնադրման միջոցով։ Այս հետազոտությունը ցույց է տալիս, թե ինչպես Հայոց պատրիարքությունը, հաղթահարելով ֆինանսական և վարչական դժվարությունները, կարողացավ ձևավորել կենսունակ մի կրթական հաստատություն, որը սոցիալ-տնտեսական և աշխարհաքաղաքական բարդ պայմաններում ևս կարողացավ ապահովել իր գործունեության շարունակականությունն ու հաստատության կենսունակությունը։ Այս հոդվածը բացահայտում է Հայոց ցեղասպանությունից հետո պատրիարք Եղիշե Դուրեանի նախաձեռնությամբ կյանքի կոչված «սրբազան վրեժի» ծրագրին, որի շրջանակում ճեմարանում կրթություն ստացան ցեղասպանությունը վերապրած որբեր։ Այս նախաձեռնությամբ ճեմարանում կրթություն ստացած հոգևորականների նոր սերունդները իրենց անուրանալի ներդրումն ունեցան Երուսաղեմի հայոց պատրիարքության և Երուսաղեմահայության հոգևոր և մշակութային կյանքի պահպանման և զարգացման գործում։
Ամբողջական տեքստը հասանելի է այստեղ՝
https://www.academia.edu/165544026/Fostering_Resilience_through_Education_The_Mission_of_the_Srp_ots_Zharankavorats_Seminary_of_the_Armenian_Patriarchate_of_Jerusalem:
