Վաղ առավոտից Հայոց ցեղասպանության թանգարան-ինստիտուտի գիտաժողովների սրահում Պրոֆեսիոնալ զբոսավարների հայկական ասոցիացիայի նախաձեռնությամբ և Հայոց ցեղասպանության թանգարան-ինստիտուտի հետ համագործակցությամբ մեկնարկվեց երկօրյա ձմեռային դպրոց՝ զբոսավարների համար մշակված հատուկ դասընթացներ։ Առաջին հանդիպումը տեղի ունեցավ փետրվարի մեկին:

Ներկաներին ողջունեց և արդյունավետ աշխատանքներ մաղթեց ՀՑԹԻ տնօրեն, պ.գ.դ. Հարություն Մարությանը:

Շուրջ 50 զբոսավարներ երկու օր շարունակ հնարավորություն կունենան ունկնդրել Հայոց ցեղասպանության հիմնահարցին առնչվող տարաբնույթ թեմաներ, լրացնել գիտելիքների պաշարը, բանախոսներին ուղղել իրենց հուզող հարցերը:

Առաջին օրը զբոսավարների հետ իրենց մասնագիտական գիտելիքներով կիսվեցին ՀՑԹԻ Վահագն Դադրյանի անվան համեմատական ցեղասպանագիտության բաժնի վարիչ, պ.գ. թ. Սուրեն Մանուկյանը «Հայոց ցեղասպանություն. ինչպես և ինչու։ Հայոց ցեղասպանության հիմնական պատճառները և իրականացման մեխանիզմները», ՀՀ ԳԱԱ արևելագիտության ինստիտուտի Թուրքիայի բաժնի վարիչի պաշտոնակատար, ավագ գիտաշ-խատող, դոցենտ, պ.գ.թ. Քրիստինե Մելքոնյանը «Սևրի, Մոսկվայի, Կարսի, Լոզանի պայմանագրերի հիմնական դրույթները», ՀՑԹԻ ավագ գիտաշխատող, պ.գ.թ. Արամ Միրզոյանը «Գերմանիան և Հայոց ցեղասպանությունը. իրականության, առասպելների և մարդասիրության եռանկյունի» և ՀՑԹԻ ավագ գիտաշխատող, պ.գ.թ. Ռոբերտ Թաթոյանը «Հայոց ցեղասպանությունը և Ռուսաստանի արձագանքը. ռազմաքաղաքական, մարդասիրական և գրականմշակութային ասպեկտներ» թեմաներով:

Զբոսավարների համար մշակված հատուկ դասընթացը կշարունակվի նաև փետրվարի երկուսին:

Երկրորդ օրվա բանախոսներն են ՀՑԹԻ գիտության գծով փոխտնօրեն, պ.գ.թ. Էդիտա Գզոյանը «Երիտթուրքական դատավարությունների նշանակությունը. իրավական վերլուծություն», ՀՑԹԻ գլխավոր ֆոնդապահ Գոհար Խանումյանը «Հայկական Նեմեսիսը պատմական և իրավական լույսի ներքո», ՀՑԹԻ գիտական աշխատող Ռեգինա Գալուստյանը «Թուրքական ազգայնականություն. նոր օսմաններից Մուստաֆա Քեմալ», ԵՊՀ արևելագիտության ֆակուլտետի դեկան, պրոֆեսոր, պ.գ.դ. Ռուբեն Մելքոնյանը «Թուրքիայի ժխտողական քաղաքականությունը. ավանդական մեթոդները և նոր միտումները», ԵՊՀ եվրոպական և միջազգային իրավունքի ամբիոնի ասիստենտ, իրավ.գ. թ. Լևոն Գևորգյանը «Հայոց ցեղասպանության համար միջազգային-իրավական պատասխանատվության հիմնախնդիրը, հատուցման հնարավոր ձևերն ու տեսակները» թեմաներով:

Փետրվարի երկուսին փակման խոսքով ելույթ կունենա նաև ՀՑԹԻ տնօրեն Հարություն Մարությանը՝ Հայոց ցեղասպանության ներկայացման մի քանի շեշտադրումների շուրջ թեմայով:


Արտաքին կապերի և լրատվության բաժին