24.01.2012
Ֆրանսիայի խորհրդարանի վերին պալատը՝ Սենատը, ձայների 127 կողմ և 86 դեմ հարաբերակցությամբ ընդունեց ցեղասպանությունների ժխտումը քրեականացնելու մասին օրինագիծը:
Օրինագիծը դեկտեմբերի 22–ին արժանացել էր Ֆրանսիայի խորհրդարանի ստորին պալատի՝ Ազգային ժողովի հավանությանը։
Նոր օրինագծի համաձայն՝ Ֆրանսիայում Հայոց ցեղասպանությունը ժխտողներին 1 տարվա ազատազրկում է սպառնում և 45.000 եվրո տուգանք։
Ըստ կանոնակարգի՝ Ֆրանսիայի նախագահը 15-օրյա ժամկետում կհաստատի այն: Նա իրավունք ունի նշված ժամկետում նաեւ խնդրել խորհրդարանին վերանայել օրենքը, կամ դրա առանձին կետեր:
Հիշեցնենք, որ օրենքի նախագիծը ներկայացրել էր իշխող «Միություն հանուն ժողովրդական շարժման» (UMP) կուսակցության անդամ Վալերի Բուայեն:
Ֆրանսիան Հայոց ցեղասպանությունը ճանաչել և դատապարտել է դեռևս 2001թ.:
20.12.2011
Թուրքական կառավարության կողմից ծրագրված և իրականացված ցեղասպանության զոհ դարձան նաև տասնյակ հազարավոր հայ երեխաներ: Նրանք, ովքեր կարողացան կենդանի մնալ, դարձան ծնողական գուրգուրանքից զրկված որբեր, որոնց մի մասը, կտրվելով իր միջավայրից, կորցրեց հայի ինքնությունը: Բռնի թրքացման ու իսլամացման նպատակին ծառայեցին նաև հատուկ այդ նպատակով թուրքական կառավարության կողմից ստեղծված որբանոցները:
Ցեղասպանությունից հետո հայկական և միջազգային բազմաթիվ կազմակերպություններ և անհատ բարերարներ տարաբնույթ նախաձեռնություններով փորձեցին փրկել հայության բեկորները: Սկիզբ առավ մարդկության հումանիտար պատմության մեջ աննախադեպ մի փրկարար առաքելություն, որի նպատակն էր փրկել ու փրկագնել բռնի թրքացված և իսլամացված հազարավոր հայ երեխաների ու կանանց: Այդ առաքելության առաջին դիրքերում էր «Ամերիկյան մերձավորարևելյան նպաստամատույց կազմակերպությունը», որը ստեղծվել էր դեռևս 1915թ.:
Ստորև ներկայացվող թվով 17 լուսանկարները վերջերս ՀՑԹԻ ջանքերով հայտաբերվեցին երևանաբնակ ընտանիքներից մեկում: Այն ներկայացնում է Մերձավորարևելյան նպաստամատույցի որբախնամ գործունեությունը Ալեքսանդրապոլում, (ներկայիս` Գյումրի), Պաղեստինում և Լիբանանում:
Այս լուսանկարները, հիրավի, իրենց արժանի տեղն ունեն համաշխարհային հումանիտար պատմության տարեգրության մեջ:
