01.07.2016
Այսօր Հայոց ցեղասպանության թանգարան-ինստիտուտի գիտաժողովների սրահում տեղի ունեցավ Վիտալի Յանկոյի՝ Մեծ եղեռնը վերապրածների պատմությունների հիման վրա կազմված «Խոստացիր ինձ, ծովը վկա» հուշագրության հայերեն և ռուսերեն հրատարակությունների, ինչպես նաև Ռուբինա Փիրումյանի՝ «Հայոց ցեղասպանության արտացոլումը գրականության մեջ. երկրորդ սերնդի արձագանքները» մենագրության շնորհանդեսը:
Գրքերը հրատարակել է Հայոց ցեղասպանության թանգարան-ինստիտուտը:
Շնորհանդեսին ներկա էին նաև հեղինակները:
«Հայոց ցեղասպանության արտացոլումը գրականության մեջ. երկրորդ սերնդի արձագանքները» անգլերեն մենագրությունը տիկին Ռուբինա Փիրումյանի չորրորդ գիրքն է Հայոց ցեղասպանության թեմայի վերաբերյալ: Հեղինակը քննության է առել ցեղասպանության ազդեցության փոխանցումը վերապրածների երկրորդ սերնդի գեղարվեստական գրականության մեջ: Ինչպես նախորդ աշխատությունների պարագայում՝ գեղարվեստական գրականությունը դառնում է արտացոլքը Հայոց ցեղասպանության ազդեցության՝ երկրորդ սերնդի կյանքի, ներկայի և ապագայի վրա, նշում է հեղինակը:
Վիտալի Յանկոյի «Խոստացիր ինձ, ծովը վկա» պատմավավերագրական վեպում ներկայացված է 1915-1922թթ. Հայոց ցեղասպանությունը վերապրած մի ընտանիքի պատմություն: Հեղինակը գրառել է պատմությունը անցյալ դարի յոթանասունականներին՝ գրքի հերոսի՝ Նարգիզ Ժամկոչյանի հուշերից: Ընթերցողը ծանոթանում է հերոսուհու ընտանիքի որոշ անդամների փրկության զարմանալի պատմությանը, բռնագաղթի ճանապարհն անցած և անհավանական հրաշքով ողջ մնացած մարդկանց հետագա ճակատագրին: Գիրքն առաջին անգամ լույս է տեսել անգլերենով 2004թ. Միացյալ Նահանգներում: Անցյալ տարի Հայոց ցեղասպանության թանգարան-ինստիտուտի ջանքերով այն թարգմանվել է հայերեն և ռուսերեն:
Շնորհանդեսի ընթացքում հեղինակները ներկայացրեցին իրենց աշխատանքները և ստորագրված օրինակներ նվիրեցին միջոցառման մասնակիցներին:
