11.02.2015


Լուսանկարում Հոլիվուդի հայտնի կինոդերասան Ջեքի Կուգանն է կարիքավոր հայերին հագուստ հանձնելու կայանում: Նրան դիմավորում է ամերիկյան նպաստամատույցի աշխատակիցը, ում հագին այդ կազմակերպության համազգեստն է:

Այդպիսի կայաններ ստեղծվեցին Միացյալ Նահանգների բազմաթիվ քաղաքներում:

Դեռևս մանուկ հասակում Ջեքի Կուգանը հայտնի դարձավ հատկապես Չառլի Չապլինի հետ «Փոքրիկը» համր ֆիլմի նկարահանումից հետո: Հաշվի առնելով նրա հռչակը՝ արդեն ճանաչված մանկահասակ դերասանին Մերձավոր Արևելքի ամերիկյան նպաստամատույց կոմիտեն ներգրավեց տարածաշրջանի հազարավոր որբերին օգնելություն ցուցաբերելու գործում:

Ջեքի Կուգանի մասնակցությամբ ողջ Միացյալ Նահանգներով մեկ ստեղծվեցի «Նեստլե» կաթնամթերքի և Հագուստ հանձնելու կայաններ, ուր Ջ. Կուգանի կոչով հազարավոր ամերիկացի երեխաներ հանձնում էին հագուստ և կաթնամթերք: Կուգանն ինքը 1925-ին մարդասիրական օգնությամբ բեռնված նավով հասավ Հունաստան, որտեղ հաստատվել էին հազարավոր հայ երեխաներ, և անձամբ բաշխեց այդ օգնությունը հայ և հույն որբերին: Այս քայլի համար Ջեքի Կուգանը պետական պարգևների արժանացավ Հունաստանի կառավարության կողմից, իսկ հայ որբերը նրա և «Նեստլեի» պատվին նույնիսկ երգ հորինեցին:


«Դուք հրաշալի մի նամակ էիք գրել ինձ... Ես մինչ օրս հիշում եմ, թե ինչպես ճանապարհորդելով Ամերիկայով` պատմում էի բոլորին որբերի և Հունաստանում հաստատված սովյալ երեխաների մասին: Ուրախ եմ, որ Ձեզ դուր է եկել «Nestle»-ն: Որպես պապիկ ես պարտավոր եմ իմ թոռներին պատմել այն երգի մասին, որ դուք ձոնել էիք ինձ, և Ձեր առաջարկի մասինª նրանց այդ երգը ունկնդրելու հնարավորություն ընձեռել: Դա շատ հուզիչ գաղափար է...»:

Հատված Ջեքի Կուգանի` Հունաստանում հաստատված հայ որբուհի Վերժինե Եղիայանին հասցեագրած նամակից

Լուսանկարի աղբյուրը՝ Կալիֆոռնիայի համալսարանի հավաքածու
«100 ԼՈՒՍԱՆԿԱՐՉԱԿԱՆ ՊԱՏՄՈՒՅԹՈՒՆՆԵՐ ՀԱՅՈՑ ՑԵՂԱՍՊԱՆՈՒԹՅԱՆ ՄԱՍԻՆ» գրքից