12.12.2018


Այսօր ՀՑԹԻ գիտաժողովների սրահում տեղի ունեցավ Փոխըմբռնման հուշագրի ստորագրում «Հայոց ցեղասպանության թանգարան-ինստիտուտ» հիմնադրամի և Կանադայի մարդու իրավունքների թանգարանի (ԿՄԻԹ) միջև:

Հուշագիրը ստորագրեցին «Հայոց ցեղասպանության թանգարան-ինստիտուտ» հիմնադրամի տնօրեն Հարություն Մարությանը և Կանադայի մարդու իրավունքների թանգարանի նախագահ Ջոն Յանգը:

Երկու կառույցներն էլ, իրենց գործունեության հիմքում ունենալով մարդու իրավունքների խթանումը, հարգանքը մյուսների հանդեպ, կրթության, երկխոսության միջոցով հաշտեցումը, կարևորել են այս հարցերում իրենց ջանքերի համատեղումը, և նախաձեռնել են Փոխըմբռնման հուշագրի ստորագրում, ինչը հնարավորություն կտա շատ հարցերում հանդես գալ համատեղ և, իհարկե, ունենալ համագործակցության լուրջ ոլորտներ: Դեռևս 2013 թ. նմանօրինակ հուշագիր արդեն կնքվել էր երկու կառույցների միջև, սակայն այս մեկն ավելի լայն համագործակցության հարթակներ է ընձեռում:

Հուշագիրը հնարավորություն է տալիս ունենալ ինչպես կրթական, գիտական, թանգարանային համագործակցության, այնպես էլ միջթանգարանային միջոցառումների կազմակերպման հնարավորություն՝ ժամանակավոր ցուցադրությունների կազմակերպում, փոխանակում և այլն:

Հուշագիրը կողմերին տալիս է նաև Հայոց ցեղասպանության, Մարդու իրավունքների ուսումնասիրության, գիտական նյութերի ու փորձի փոխանակման բնագավառում համագործակցություն ունենալու բացառիկ հնարավորություն:

Հուշագրի համաձայն, կողմերը պարտավորվում են պաշտոնական կայքէջերում տեղադրել միմյանց գործունեության մասին տեղեկատվություն՝ գիտաժողովների, գիտական ծրագրերի մասին հայտարարություններ, համատեղ իրականացված միջոցառումների մասին լուսաբանումներ:

Փոխըմբռնման հուշագիրն ուժի մեջ է ստորագրելու պահից սկսած՝ հինգ տարի ժամկետով:

Հուշագրի կատարող կողմերն են ՀՑԹԻ փոխտնօրեն Էդիտա Գզոյանը, ԿՄԻԹ-ի նախագահի ավագ խորհրդական Քլինտ Քուրլը:

Միջոցառմանը ներկա էին նաև ՀՀ ԱԳՆ քաղաքական ծրագրավորման վարչության պետ Արմեն Եգանյանը, Կանադայի դեսպանության ներկայացուցիչ Անիկ Գուլեն՝ նստավայրը Մոսկվա, Կանադայի Զորյան ինստիտուտի նախագահ Գրեգ Սարգսյանը, ինչպես նաև ՀՑԹԻ աշխատակիցներ:

Հուշագրի ստորագրումից հետո հյուրերն այցելեցին Հայոց ցեղասպանության հուշահամալիր, ծաղիկներ դրեցին անմար կրակի մոտ, լռությամբ հարգեցին անմեղ զոհերի հիշատակը: Պարոն Մարությանը ներկայացրեց ինչպես հուշահամալիրի, այնպես էլ Հուշապատի կառուցման պատմությունը, հուշակոթողի խորհրդանշական իմաստը:

Կանադայից ժամանած հյուրերը եղան նաև Հայոց ցեղասպանության թանգարանում, ծանոթացան Հայոց ցեղասպանությունը հավաստող վավերագրերին ու փաստաթղթերին, դիտեցին ցուցանմուշները, այցի ավարտին պարոն Յանգը գրառում կատարեց Պատվավոր հյուրերի հուշամատյանում։