14.05.2021
Բանախոս՝ Հարություն Մարության, Հայոց ցեղասպանության թանգարան-ինստիտուտի տնօրեն, պ.գ.դ.
Թեմա՝ Հայերի իրական և կեղծ «փրկողները» Հայոց ցեղասպանության տարիներին
Դպրոց՝ Գեղարքունիքի մարզի Գագարինի միջնակարգ դպրոց, 8-րդ դասարան
Ս. թ. մայիսի 14-ին տեղի ունեցավ «Հայոց ցեղասպանության թեմայի ուսուցում» կրթական ծրագրի հերթական հանդիպումը: ՀՑԹԻ տնօրեն, պ.գ.դ. Հարություն Մարությանը Գեղարքունիքի մարզի Գագարինի միջնակարգ դպրոցի 8-րդ դասարանի աշակերտների համար դասախոսություն կարդաց «Հայերի իրական և կեղծ «փրկողները» Հայոց ցեղասպանության տարիներին» թեմայով:
Հարություն Մարությանը դասախոսությունն սկսեց «փրկել» և «փրկություն» եզրույթների բացատրությամբ, ապա շեշտադրեց ցեղասպանության ժամանակ որպես «փրկություն» ներկայացվող երևույթի ընկալումներն ու մեկնաբանությունները:
Բանախոսը նշեց, որ իրական փրկողները վտանգում էին իրենց ու իրենց ընտանիքների կյանքը՝ այլոց փրկելու համար: Դրանք մարդիկ էին, ովքեր արհամարհում էին գործող օրենքները, հակադրվում ընդհանրական տարածում ունեցող տեսակետներին, այնինչ Հայոց ցեղասպանության տարիներին փրկության գործոնի խաղարկումը միջոց էր դառնում կոտորածի համար, «վատագույն» դեպքում՝ «փրկողների» հարստացման միջոց:
Բանախոսն ընդգծեց, որ Հայոց ցեղասպանության տարիներին տնտեսական շահագործման կամ բռնի կրոնափոխության ենթարկելով «փրկության» դեպքերը շատ են եղել, մինչդեռ փոքրաթիվ էին իրական փրկությունների դեպքերը: Այսինքն՝ փրկության դեպքերի ճնշող մեծամասնությունը վերաբերել է կանանց ու երեխաների փրկությանը, տղամարդկանց և կամ ամբողջական ընտանիքների փրկության դեպքեր շատ քիչ են եղել, և մեր օրերում դրանց վրա արվող շեշտադրումները հետապնդում են միայն քաղաքական ու քարոզչական նպատակներ:
Դասախոսությունն ավարտվեց քննարկմամբ:
Կրթական ծրագրի շրջանակներում Հայոց ցեղասպանության թանգարան այցելած դպրոցականները շրջեցին նաև թանգարանի ցուցասրահներով:
