2019 թվականից Հայոց ցեղասպանության թանգարան-ինստիտուտը մեկնարկել է «Հայոց ցեղասպանության թեմայի ուսուցում» անվճար կրթական ծրագիրը: Այն նախատեսված է հանրակրթական միջին (VIII-IX դասարաններ) և ավագ (X, XI, XII դասարաններ) դպրոցների աշակերտների համար:

Կրթական ծրագրի նպատակն է դպրոցականերին ներկայացնել Հայոց ցեղասպանության պատմությունը, հաղորդակից դարձնել Արևմտյան Հայաստանի պատմական ժառանգությանն ու հայ ժողովրդի հերոսական վերապրմանը:

Մինչ օրս ՀՑԹԻ գիտաշխատողների կողմից դպրոցականներին ներկայացված թեմաների ցանկը տեղադրված է ՀՑԹԻ կայքում (հղումը՝ http://www.genocide-museum.am/arm/pdf/25.03.2021.pdf): Թեմաներն ընդգրկում են Հայոց ցեղասպանության իրականացման վճիռները, ընթացքը, առանձին դրվագներ՝ կրոնի դերակատարությունը, ինքնապաշտպանական մարտերը, հանցագործության ճանաչումն ու իրավական դատապարտումը, ինչպես նաև թուրքական պետական ժխտողականությունը, ընդհանուր՝ 15 թեմա, որոնք ներկայացվում են դպրոցի տվյալ ուսուցչի ընտրությամբ:

2021 թ. մարտ-մայիս ամիսներին ՀՑԹԻ-ն կրթական ծրագրի շրջանակներում սպասարկել է երևանյան և մարզային 16 դպրոցների, ինչպես նաև մասնագիտացված դպրոցների, քոլեջների հումանիտար և բնագիտական հոսքերի 561 աշակերտ: Այս եռամսյակում ամենահաճախ ընտրված (13 անգամ) թեման` «Հայկական «Նեմեսիսը» գործողության մեջ» թեման է, որը ներկայացվել է ՀՑԹԻ թանգարանային ֆոնդերի բաժնի վարիչ Գոհար Խանումյանի կողմից: «Հայոց ցեղասպանության թեմայի ուսուցում» կրթական ծրագրի շրջանակներում փորձ է կատարվել նաև խթանել աշակերտների քննադատական մտածողությունը. դասախոսություններն ավարտվում էին ակտիվ քննարկմամբ, աշակերտները բարձրաձայնում էին իրենց հուզող հարցերը:

Նշենք նաև, որ վերոնշյալ դպրոցների պատմության ուսուցիչների մեծ մասը մասնակցել են 2019 թ. ի վեր ՀՑԹԻ-ի կողմից կազմակերպվող «Հայոց ցեղասպանության թեմայի ուսուցում» ամենամյա ամառային դպրոցին: Ուսուցիչների դրական արձագանքները, մշտական կապը ՀՑԹԻ կրթական ծրագրերի բաժնի հետ, դասարանների թանգարան հաճախելիության աճը և ընտրված թեմատիկայով դասախոսություններին մասնակցելը փաստում են ՀՑԹԻ կրթական ծրագրերի արդյունավետությունը: Ուսուցիչների առաջարկները, քննարկումները նպաստում են դասընթացների շարունակական բարելավմանը: