17.10.2013
Այսօր ՀՀ Արտաքին գործերի նախարարությունում տեղի ունեցավ Հայոց ցեղասպանության թանգարան-ինստիտուտի տնօրեն Հայկ Դեմոյանի «Թուրքիայի արտաքին քաղաքականությունը և Ղարաբաղյան հակամարտությունը» գրքի շնորհանդեսը, որին ներկա էին Երևանում հավատարմագրված դեսպաններ, գիտական և փորձագիտական շրջանակների ներկայացուցիչներ:
Շնորհանդեսին ողջույնի խոսքով հանդես եկավ ՀՀ ԱԳ նախարար Էդվարդ Նալբանդյանը: Շնորհավորելով հեղինակին գրքի հրատարակման կապակցությամբ՝ նախարարը ասաց. «Հետաքրքրությամբ եմ կարդացել կարևոր գիտական արժեք ունեցող այս մենագրությունը և վստահ եմ, որ այն արժանի է ուշադրության ոչ միայն պատմաբանների, փորձագետների, դիվանագետների, բոլոր այն հետազոտողների, որոնք հետաքրքրվում են մեր տարածաշրջանով, այլև առավել լայն շրջանակի ընթերցողների համար»,- նշեց արտգործնախարար Նալբանդյանը:
Գրքի գիտական արժեքների մասին խոսեցին նաև պատմական գիտությունների դոկտոր, պրոֆեսոր, ԳԱԱ թղթակից անդամ Նիկոլայ Հովհաննիսյանը և ԱԳՆ սահմանակից երկրների վարչության պետ, պատմական գիտությունների դոկտոր, պրոֆեսոր Արսեն Ավագյանը։ Նիկոլայ Հովհաննիսյանն իր խոսքում ընդգծեց նաև գրքի արցախագիտության ոլորտում ունեցած արժեքի մասին: Արսեն Ավագյանն առանձնացրեց գրքի գիտակիրառական նշանակությունը:
Իր խոսքում շնորհակալություն հայտնելով արտգործնախարարությանը գրքի շնորհանդեսի կազմակերպման համար, Հայկ Դեմոյանը ասաց, որ այս գիրքը տասնհինգ տարվա իր գիտահետազոտական աշխատանքի ամփոփումն է, որտեղ ներկայացված է Թուրքիայի արտաքին քաղաքականությունը ղարաբաղյան հիմնախնդրի հանդեպ՝ դրա ծագումից մինչև մեր օրերը։ Նա շեշտեց, որ սույն աշխատության մեջ առաջին անգամ շրջանառության մեջ են դրվում մինչ օրս անհայտ պատմական, արխիվային վավերագրեր և փաստաթղթեր, որոնք լույս են սփռում այս խնդրի վերաբերյալ։
«Բերված ընդարձակ նյութի վրա աշխատությունում հիմնավորվում է, որ Թուրքիան հանդես գալով Ադրբեջանի կողմից լրջորեն նպաստեց հիմնախնդրի թեժացմանը, և շարունակում է բացասաբար ազդել կարգավորման գործընթացի վրա», – ընդգծեց գրքի հեղինակ Հայկ Դեմոյանը։
«Թուրքիայի արտաքին քաղաքականությունը և Ղարաբաղյան հակամարտությունը» ուսումնասիրությունը Ղարաբաղյան հակամարտության նկատմամբ 20-րդ դարի վերջում՝ 21-րդ դարի սկզբին Թուրքիայի վարած արտաքին քաղաքականության և պատմա-համեմատական վերլուծություն է: Գրքում ներկայացված է Լեռնային Ղարաբաղի հիմնահարցի վերլուծությունը հայ-թուրքական հարաբերությունների և նեոպանթուրքիզմի արտաքին քաղաքականության դոկտրինի տեսանկյունից:
Գրքի պատրաստման ընթացքում օգտագործվել են նյութեր Բաց Հասարակության Արխիվից (Open Society Archives, Բուդապեշտ, Հունգարիա), Մեծ Բրիտանիայի արտաքին գործերի նախարարության արխիվից (British Foreign Office Public Record), Հայաստանի Ազգային Արխիվից, Հայաստանի արտաքին գործերի նախարարության դիվանագիտական արխիվից, Հայոց ցեղասպանության թանգարան-ինստիտուտի արխիվից և այլն:
Գիրքը նախատեսված է փորձագետների, գիտնականների, ուսանողների և ընթերցողների լայն շրջանակի համար, ովքեր հետքրքրվում են Կովկասում էթնո-քաղաքական հակամարտությունների բռնկման պատճառներով:
Հիշեցնենք, որ ս. թ. սեպտեմբերի 16-ին «Արգումենտի ի ֆակտի» շաբաթաթերթի մամուլի կենտրոնում տեղի էր ունեցել Հայկ Դեմոյանի «Թուրքիայի արտաքին քաղաքականությունը և Ղարաբաղյան հակամարտությունը»
գրքի մոսկովյան շնորհանդեսը։
