18.03.2023
ՀՀ կրթության, գիտության, մշակույթի և սպորտի նախարարության աջակցությամբ, Պատմամշակութային ժառանգության գիտահետազոտական կենտրոնի և Ֆրանսիայի ժառանգության ազգային ինստիտուտի կազմակերպմամբ մարտի 13-16-ը Հայաստանի պատմության թանգարանում և Հայաստանի ազգային պատկերասրահում տեղի ունեցավ «Մշակութային արժեքների պահպանության պլան» խորագրով վերապատրաստման դասընթացը: Ծրագրին մասնակցում էին թանգարանների, գրադարանների, արխիվների, ինչպես նաև Ճգնաժամային կառավարման պետական ակադեմիայի և ՆԳՆ փրկարար ծառայության ավելի քան 70 մասնագետներ:
ՀՑԹԻ-ից վերապատրաստման դասընթացին մասնակցում էին ՀՑԹԻ թանգարանային ֆոնդերի բաժնի վարիչ, գլխավոր ֆոնդապահ Գոհար Խանումյանը, գիտական գրադարանի բաժնի վարիչ Հասմիկ Մաիլյանը, ֆոնդապահներ Արփինե Դուրինյանը, Արևիկ Սմբատյանը և գրադարանավար Վարդուհի Հունանյանը:
Դասընթացը վարում էին Ֆրանսիայի թանգարանների հետազոտությունների և վերականգնման կենտրոնի կանխարգելիչ պահպանության ծրագրերի ղեկավար, Ֆրանսիայի «Կապույտ վահան» կազմակերպության նախագահ Մարի Կուրսելոն և գրաֆիկական աշխատանքների վերականգնող, կանխարգելիչ պահպանության մասնագետ, Ֆրանսիայի «Կապույտ վահան» կազմակերպության գլխավոր քարտուղար Կամիլ Օմոնը: Վերապատրաստման դասընթացի նպատակն էր աջակցել մշակութային հաստատություններին մշակելու «Մշակութային արժեքների պահպանության պլան»-ը: Բանախոսները ներկայացրեցին «Մշակութային արժեքների պահպանության պլան»-ի մարտահրավերները, առաջնահերթ տարհանման ենթակա մշակութային արժեքների դասակարգումը, մեթոդաբանական ընտրությունը և մշակութային արժեքների տարհանման պլանի կազմումը, անդրադարձ կատարեցին արտաքին և ներքին ռիսկերի վերլուծությանը: Դասընթացն ուղեկցվեց գործնական վարժանքներով և խմբային աշխատանքով:
