Բանախոս՝ Քրիստինե Նաջարյան, ՀՑԹԻ Կրթական ծրագրերի բաժնի վարիչ
Թեմա՝ Հայոց ցեղասպանությունն առանձին անձերի պատմությունների միջոցով. Մուշեղիկ, Ավրորա
Դպրոց՝ ք. Երևան, Գալուստ Գյուլբենկյանի անվան թիվ 190 դպրոց, 11-րդ դասարան, տնտեսագիտական հոսք

Փետրվարի 20-ին ՀՑԹԻ գիտաժողովների սրահում տեղի ունեցավ 2020 թ. Կրթական ծրագրերի հերթական հանդիպումը: ՀՑԹԻ Կրթական ծրագրերի բաժնի վարիչ Քրիստինե Նաջարյանն ավագ դպրոցի աշակերտների համար կարդաց Հայոց ցեղասպանությունը վերապրածների առանձին պատմություններին նվիրված դասախոսություն՝ Հայոց ցեղասպանությունն առանձին անձերի պատմությունների միջոցով. Մուշեղիկ, Ավրորա թեմայով։

Գալուստ Գյուլբենկյանի անվան թիվ 190 դպրոցի 11-րդ դասարանի աշակերտները բացի հիմնական նյութից հնարավորություն ունեցան ֆիլմ դիտել, ծանոթանալ վերապրածների տեսաձայնագրություններին, թեմային առնչվող բնօրինակ ցուցանմուշներ, իրեր և այլն:

Աշակերտներն ակտիվ մասնակցեցին քննարկմանն ու հարցուպատասխանին։ Դասընթացի ավարտին հատուկ մշակված հարցաշարի միջոցով Կրթական ծրագրերի պատասխանատուները տեղեկացան աշակերտների՝ թեմայի ընկալման սահմաններին, նրանց դիտարկումներին:

«Աստված չանի ես հայտնվեի իրենց փոխարեն…, Մուշեղիկի մայրը վարվեց այնպես, ինչպես կվարվեր ցանկացած մայր իր զավակին փրկելու համար…, Ես կրոնափոխ չէի լինի, ավելի լավ է մեռնեի…, Յուրաքանչյուր մայր ամեն ինչի պատրաստ է հանուն իր երեխայի…, Կրոնափոխ չէի լինի, որովհետև պատմությունը ցույց է տալիս, որ պետք չէ վստահել թուրքերին…», - գրում են աշակերտները:

Իսկ այն հարցին՝ եթե հրաշքով Մուշեղիկին/Ավրորային հանդիպեիք ի՞նչ կասեիք նրանց, աշակերտները պատասխանել են. «Մուշեղիկին կասեի, որ դու շատ ուժեղ ես, որ դիմացել ես և փրկվել…, Ավրորային հանդիպելիս կպատմեի իմ անսահման հիացմունքի մասին…, Ավրորային հանդիպելիս կասեի շատ շնորհակալություն, որ ունեցել է այդքան մեծ կամքի ուժ…, Ես հասկացա, որ ինչ էլ լինի պետք չէ հուսահատվել…, Դուք հերոսներ եք…, Կասեի, որ հպարտ եմ, որ տեսնում եմ նրանց, հպարտ եմ, որ ազգակիցներ ենք և շնորհակալ եմ…, Ինչպե՞ս եք կարողացել դիմանալ, ես չէի կարող…»

Աշակերտներն այցելեցին նաև Հայոց ցեղասպանության թանգարան: