Սեպտեմբերի 20-ին Մատենադարանի նոր գիտական մասնաշենքում տեղի ունեցավ Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի երկրորդ նիստը, որը վարեց հանձնաժողովի նախագահ, ՀՀ նախագահ Սերժ Սարգսյանը:
Մինչ նիստի օրակարգում ներառված հարցերի քննարկումը, Նախագահը տեղեկացրեց, որ առաջին նիստից հետո պետական հանձնաժողովի քարտուղարությունը աշխատանքներ է իրականացրել տարբեր երկրներում տեղական հանձնաժողովների կազմակերպման ուղղությամբ:
Օրակարգի հարցերի շրջանակում նիստի մասնակիցներն անդրադարձան պետական հանձնաժողովի և հանձնաժողովին կից փորձագիտական խմբի կազմերին: Ներկայացվեց հանձնաժողովի կազմն ընդլայնելու առաջարկություն, որն ընդունվեց: Որոշման համաձայն, հանձնաժողովի կազմում ընդգրկվեցին Հոմենետմենի, ՀԲԸՄ Հայ երիտասարդաց ու Հոմենմենի ներկայացուցիչները՝ հաշվի առնելով երիտասարդությանը Հայոց ցեղասպանության 100-րդ տարելիցի միջոցառումներին ներգրավելու կարևորությունը: Հանձնաժողովի կազմում ընդգրկվեց նաև «Փյունիկ» հիմնադրամի նախագահ, բարերար Գաբրիել Ջամբարջյանը:
Նիստում հաստատվեց հանձնաժողովին կից փորձագիտական խմբի 25 հոգանոց կազմը՝ չբացառելով հետագայում այն համալրելու հնարավորությունը: Պետական հանձնաժողովի քարտուղար Հայկ Դեմոյանն առաջարկեց որպես սկզբունք ընդունել փորձագիտական խմբում Հայոց ցեղասպանության ճանաչման գործում նշանակալի ավանդ ներդրած և դրա համար ՀՀ նախագահի մրցանակի արժանացած անձանց ընդգրկելն ու ամեն տարի այդ կազմը նոր մրցանակակիրներով համալրելը: Առաջարկվեց 2012 թ. մրցանակակիր Հարություն Մարությանի թեկնածությունը, որն ընդունվեց հանձնաժողովի կողմից:
Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի նիստում Հայոց ցեղասպանության թանգարան-ինստիտուտի տնօրեն, հանձնաժողովի քարտուղար Հայկ Դեմոյանը ներկայացրեց 2011-2012թթ. ընթացքում պետական հանձնաժողովի քարտուղարության կողմից իրականացված աշխատանքների հաշվետվությունը, որն ընդունվեց ի գիտություն պետական հանձնաժողովի կողմից:
Նիստի մասնակիցները լայն քննարկում ծավալեցին Հայոց ցեղասպանության 100-րդ տարելիցի կապակցությամբ կազմակերպվելիք միջոցառումների ընդհանուր ռազմավարության, հայեցակարգային ու ծրագրային մոտեցումների և հանձնաժողովի գործունեության ուղղությունների շուրջ:
Օրակարգի հարցերի շրջանակում հանձնաժողովը քննարկեց և հաստատեց Հայոց ցեղասպանության 100-րդ տարելիցի միջոցառումների առանձնանշանի և կարգախոսի մրցույթ անցկացնելու մասին հայտարարությունը:
Նկատի առնելով տարելիցի կապակցությամբ կազմակերպվելիք միջոցառումների հանրային իրազեկման և լուսաբանման կարևորությունը, նաև համացանցի միջոցով հայ և օտար լսարաններին տեղեկատվության անընդհատ մատուցումը՝ պետական հանձնաժողովի քարտուղարությունը ներկայացրեց հանձնաժողովի պաշտոնական կայքէջի նախագիծը: Հանձնաժողովն առաջարկեց սկզբնական շրջանում կայքէջը թողարկել մեկնարկային 7 լեզուներով: Պետական հանձնաժողովի քարտուղար Հ. Դեմոյանը հանձնաժողովի անդամներին հայտնեց, որ կայքէջի գործարկումը տեղի կունենա այս տարվա դեկտեմբերի 1-ին:
ՀՀ Նախագահ Սերժ Սարգսյանը հանձնաժողովի անդամներին տեղեկացրեց, որ սկսվել են նաև Ծիծեռնակաբերդի հուշահամալիրի հիմնավերանորոգման, Հայոց ցեղասպանության թանգարանի ընդարձակման և նոր ցուցադրության կազմակերպման աշխատանքները, որոնք հարյուրամյակի կապակցությամբ կազմակերպվելիք միջոցառումների մասն են կազմելու:
Պետական հանձնաժողովը որոշեց` հաջորդ նիստը հրավիրել 2013թ. մայիսի 27-ին՝ Հայաստանի առաջին հանրապետության հիմնադրման 95-րդ տարեդարձի նախօրեին, իսկ անհրաժեշտության դեպքում գումարել նաև լրացուցիչ նիստ` նույն տարվա ընթացքում:
