22.04.2017


Ապրիլի 22-ին Հայոց ցեղասպանության թանգարան-ինստիտուտի գիտաժողովների սրահում տեղի ունեցավ ամերիկյան Կոլումբիայի համալսարանի փորձագետ, հոգեբան Անի Գալայջյանի դասախոսությունը:

«Իմաստալից աշխարհ» մարդասիրական նպաստամատույց ծրագիրը, որը կազմել է դոկտոր Անի Գալայջյանը, գործի է դնում մի մոդել, որի ընթացքում կատարվում են հետտրավմատիկ ախտորոշումներ, կոնֆլիկտների, բռնությունների, վեճերի, ապրումների, ցնցումների բնորոշում, հետազոտում, գնահատում: Այնուհետև կիրառվում է հետևանքների վերացման բուժական-հոգեբանական ծրագիր:

Դոկտոր Անի Գալայջյանը տրավմատիկ խեղումների գծով հավաստագրված փորձագետ է: Նա անդամակցում է ՄԱԿ-ի Հոգևոր արժեքների և գլոբալ մտահոգությունների գործադիր կոմիտեին, ղեկավարում է Միացյալ Նահանգների հոգեբանների ասոցիացիայի բռնությունների կանխարգելման և ուղորդման կոմիտեի միջազգային բաժինը: Գրել է «Աղետն ու զանգվածային տրավման» հետազոտությունը, հեղինակել է տարբեր տեսություններ և բուժական պրակտիկաներ: Այդ պրակտիկաների մի մասն ուղղված է Ցեղասպանության տրավմայի սերնդային փոխանցման կանխարգելմանը:

«Մենք ուշադրություն ենք դարձնում, որ պատահածը չմնա տուժողի հոգեբանության մեջ: Շատերն ասում են՝ տուժող ազգ ենք, սա մեր ճակատագիրն է: Սակայն այդպես չի կարելի: Այդ կերպ ավելի տուժող ենք զգում մեզ և մագնիսի պես անգիտակցաբար, անզգայաբար դարձյալ աղետներ ենք ձգում դեպի մեզ», - նշեց դոկտոր Գալայջյանը:

Դոկտոր Գալայջյանի խումբը կամավոր հիմունքներով վերջին տասնամյակում եղել է աշխարհի շուրջ 45 երկրներում, ներկայացրել ծրագիրը համալսարաններում, հոգեբաններին, ստրես-կենտրոններում, վերապրողներին:

Դասախոսությունը կազմակերպվել է «Տրավմայի իրազեկման և կանխարգելման Ասոցիացիայի(ATOP) «Իմաստալից աշխարհ (Մինինգֆուլուորլդ)՝ Մարդասիրական Առաքելություն դեպի Հայաստան» ծրագրի շրջանակներում:

Բժշկուհի Անի Գալայջյանը նախաձեռնել և ղեկավարել էր Մինինգֆուլուորլդի առաջին առաքելությունը Հայաստան 1988 թվականի ավերիչ երկրաշարժից անմիջապես հետո: Երկրաշարժից հետո գրեթե երկու տարին մեկ անգամ գալիս են Հայաստան:

Այս անգամ աշխատանքային թիմը ներկայացնում էին Մինինգֆուլուորլդի երեք դեսպաններ՝ Անի Քալայջյանը, Լեսլի Փոփոֆը և Իրեն Թանանյանը: