Բանախոս՝ Քրիստինե Նաջարյան, ՀՑԹԻ Կրթական ծրագրերի բաժնի վարիչ
Թեմա՝ Հայոց ցեղասպանությունն առանձին անձերի պատմությունների միջոցով. Մուշեղիկ, Ավրորա
Դպրոց՝ք. Երևան, «Ուսում» հանրակրթական դպրոց, VIII Ա և VIII Դ դասարաններ
2020 թվականի փետրվարի 28-ին և մարտի 11-ին «Հայոց ցեղասպանության թանգարան-ինստիտուտի» գիտաժողովների սրահում տեղի ունեցան «Հայոց ցեղասպանության թեմայի ուսուցում» կրթական ծրագրի հերթական դասընթացները: Դասընթացներին մասնակցեցին «Ուսում» հանրակրթական դպրոցի VIII Ա և VIII Դ դասարանները:
ՀՑԹԻ Կրթական ծրագրերի բաժնի վարիչ Քրիստինե Նաջարյանը դպրոցականների համար կարդաց «Հայոց ցեղասպանությունն առանձին անձերի պատմությունների միջոցով. Մուշեղիկ, Ավրորա» դասախոսությունը:
Դասընթացների ընթացքում զուգահեռներ անցկացվեցին Հայոց ցեղասպանությունը վերապրած երկու երեխաների` Արշալույսի և Մուշեղիկի պատմությունների միջև:
Երկու երեխաներ, ովքեր փրկվել են ցեղասպանությունից` սակայն ամբողջ կյանքում կրել են դրա բոլոր սարսափները և ողբերգականությունը: Երկուսն էլ ամբողջությամբ կամ մասամբ կորցրել են իրենց ընտանիքը, երկուսն էլ փրկվել են հրաշքով: Նրանցից մեկի պատմությունը դեռևս իր կենդանության օրոք իմացել է ամբողջ աշխարհը, իսկ մյուսի մասին` շատ քչերը:
Այս անհատական պատմությունների շնորհիվ աշակերտները կարողացան քննարկել և վերլուծել «Մեկ անձի պատմության միջոցով պատմել Հայոց ցեղասպանության մասին» մոտեցման կարևորությունը և ցեղասպանության մասին գիտելիքի փոխանցման մեջ ներկայացման բացառիկությունը:
Դասընթացի ընթացքում ցուցադրվեց նաև Ավրորա Մարդիգանյանի (Արշալույս Մարտիկյան) «Հոշոտված Հայաստան» (Հոգիների աճուրդ) համր ֆիլմը, որտեղ Ավրորային վիճակված էր մարմնավորելու իր իսկ կերպարը և դառնալու առաջին հայ կինոդերասանուհին:
Աշակերտները դիտեցին նաև Ավրորային նվիրված կենդանի տեսաձայնագրություններ, որտեղ ներկայացվում են անմարդկային փորձություններով լի դեռատի աղջկա բռնագաղթի ճանապարհը, փախուստը Քեմալ էֆենդնու հարեմից, իր ընտանիքի անդամների ու ազգականների սպանությունն իր իսկ աչքի առջև:
Աշակերտները դասընթացի ավարտին լրացրեցին նաև թեմային վերաբերող հարցաթերթիկներ
Կրթական ծրագրի շրջանակներում Հայոց ցեղասպանության թանգարան այցելած դպրոցականները շրջեցին նաև թանգարանի ցուցասրահներով և ծանոթացան Հայոց ցեղասպանության պատմության այլ դրվագների:
