28.10.2015


Հոկտեմբերի 28-ին ԱՄՆ-ում գործող Մերձավոր Արևելքի հիմնադրամի նախաձեռնությամբ տեղի ունեցավ հանդիսավոր ճաշկերույթ՝ նվիրված Ամերիկյան մերձավորարևելյան նպաստամատույց կոմիտեի հարյուրամյակին: Երեկոյի ընթացքում ցուցադրվեցին տեսանյութեր այս մարդասիրական կազմակերպության առաքելության մասին:

Մերձավոր Արևելքի հիմնադրամի գործադիր տնօրեն Շանթ Մարդիրոսյանը ներկայացրեց մինչ օրս գործող կազմակերպության իրականացվող և իրագործված ծրագրերը:

ՀՑԹԻ տնօրեն Հայկ Դեմոյանը նույնպես ներկա գտնվեց այս իրադարձությանը:

Երեկոյին ներկա էին նաև ԱՄՆ-ում ՀՀ դեսպան Տիգրան Սարգսյանը, ՄԱԿ-ում ՀՀ ներկայացուցիչ Զոհրաբ Մնացականյանը, ԱՄՆ նախագահներ Վուդրո Վիլսոնի և Հուվերի, դեսպան Հենրի Մորգենթաուի և մերձավորարևելյան նպաստամատույցի աշխատակիցների ժառանգներ:

Հայոց ցեղասպանության տարիներին Մերձավոր Արևելքի Նպաստամատույցի ջանքերով և ամերիկյան կառավարության ու ժողովրդի գործադրած մարդասիրական ջանքերի շնորհիվ վերահաս ոչնչացումից փրկվեցին հարյուր հազարավոր հայեր, ինչպես նաև՝ Մերձավոր Արևելքի կարիքավոր մյուս ժողովուրդների հազարավոր ներկայացուցիչներ: Մերձավոր Արևելքի Նպաստամատույցի գործունեությունը փառավոր էջ է գրել մարդկության հումանիտար պատմության մեջ:


Ավելի մանրամասն ՄԱՆ-ի գործունեության մասին՝ այստեղ՝

http://genocide-museum.am/arm/online_exhibition_10.php