Յակոբ Կյունցլերն իր «Երեսուն տարվա ծառայությունն Արևելքում» (“Dreissig Jahre Dienst im Orient”) գիրքը նվիրել է դանիացի միսիոներուհի Կարեն Եփփեին՝ առաջին էջին հետևյալ մակագրությամբ՝ “Der lieben Mitarbeiterin Caren Jeppe überreicht vom Verfasser” (Սիրելի գործընկերոջս՝ Կարեն Եփփեին, հեղինակից): Այժմ գիրքը ՀՑԹԻ-ի հավաքածուի մաս է կազմում: Այն մեզ է փոխանցել Յակոբ Կյունցլերի հետնորդը՝ պրն. Ֆելիքս Ցիգլերը:

Առաջին համաշխարհային պատերազմի ժամանակ Կյունցլերն ու Եփփեն աշխատում էին Ուրֆայում՝ ականատես լինելով Հայոց ցեղասպանությանը և փորձելով փրկել մարդկային հազարավոր կյանքեր: Տեսնելով ամենօրյա դաժանություններն անօգնական կանանց և երեխաների նկատմամբ՝ Կարեն Եփփեն ստիպված էր որոշ ժամանակով վերադառնալ Դանիա: Ճանապարհի մի մասը նրան ուղեկցում է Յակոբ Կյունցլերը՝ վստահ լինելու համար, որ նա ապահով տեղ կհասնի: Այս ճամփորդությունն ամրապնդում է նրանց կապը:

Գրքի ճակատագիրը

Ըստ «Թռչնոց բույն» որբանոցի դանիացի վերջին տնօրեն Մագդա Սորենսենի՝ Յակոբ Կյունցլերը Լիբանանից գիրքն ուղարկել է Հալեպ՝ Կարեն Եփփեին: Սակայն այն այդպես էլ Եփփեին չի հասել. նա արդեն մահացել էր: Դանիացի միսիոներուհիներից մեկը գիրքն իր հետ Բիբլոս է տանում, և այն մնում է «Թռչնոց բույն» որբանոցի գրադարանում:

1967 թ. որբանոցը հանձնվում է Կիլիկիայի կաթողիկոսարանին: Մինչև Լիբանանից մեկնելը Մագդա Սորենսենը 1971թ. հունիսի 13-ին գիրքը հանձնում է Ֆելիքս Ցիգլերին, որին Լիբանան էր ուղարկել Հայերի շվեյցարացի բարեկամների ֆեդերացիան Յակոբ Կյունցլերի հիմնադրած վերջին երկու ինստիտուտները՝ Հայ կույրերի և խուլերի կենտրոնը և Ծերանոցը, հայկական համայնքին հանձնելու առաքելությամբ: Գիրքը հանձնելիս տիկին Սորենսենը նշում է, որ այն եղել է Կարեն Եփփեի ժառանգների ձեռքերում մոտ 40 տարի և այժմ պետք է գտնվի Յակոբ Կյունցլերի ժառանգներից մեկի ձեռքերում:

«Գիրքը պահել եմ մոտ 50 տարի, բայց զգում եմ, որ լավագույն վայրը դրա համար Հայոց ցեղասպանության թանգարանն է Երևանում: Այժմ երջանիկ եմ, որ այն ապահով ձեռքերում է»,- ասում է պարոն Ցիգլերը: