Ս. թ. սեպտեմբերի 22-ին ՀՑԹԻ տնօրեն Հարություն Մարությանը Մեծ Բրիտանիայում բնակվող անկախ հետազոտող Արա Ստեփան Մելքոնյանին պարգևատրեց «Ջեյմս Բրայս» հուշամեդալով:
Շուրջ երեք տարի է պրն. Մելքոնյանը անգլերեն լեզվով թարգմանությունների և խմբագրությունների հարցում անշահախնդիր աջակցում է «Հայոց ցեղասպանության թանգարան-ինստիտուտ» հիմնադրամին: Ներկայումս ավարտին են մոտենում Արա Մելքոնյանի կողմից ՀՑԹԻ գիտաշխատողներ Ռեգինա Գալուստյանի և Ռոբերտ Թաթոյանի ծանոթագրություններով լույս տեսած հուշագրությունների (Արամ Մանթաշյան, Արամը չէր կարող Սեյտո լինել, խմբագիր, առաջաբանի և ծանոթագրությունների հեղինակ՝ Ռեգինա Գալուստյան, Սոկրատ Մկրտչյան, Հուշեր, խմբագիր, առաջաբանի և ծանոթագրությունների հեղինակ՝ Ռոբերտ Թաթոյան, Հայոց ցեղասպանությունը վերապրածների հուշագրություններ, 4, Երևան, «Հայոց ցեղասպանության թանգարան-ինստիտուտ» հիմնադրամ, 2020) անգլերեն տարբերակի թարգմանության և խմբագրական աշխատանքները:
«Հայոց ցեղասպանության, հայկական պահանջատիրության և արցախյան հիմնահարցի խաչմերուկներում. հետահայաց գնահատումներ և հեռանկարներ» խորագիրը կրող եռօրյա գիտաժողովին մասնակցելու նպատակով Հայաստան կատարած այցի ժամանակ պրն. Մելքոնյանը Հայոց ցեղասպանության թանգարան-ինստիտուտի գրադարանին հանձնեց 30 միավոր անգլերեն լեզվով գրականություն՝ հուշեր, ժողովածուներ, պատմագիտական գրքեր, Հայոց ցեղասպանության մասին:
Արա Ստեփան Մելքոնյանը արմատներով պարտիզակցի է: Մելքոնյանները Պարտիզակ գյուղի հիմնադիր ընտանիքներից են (գյուղը հիմնադրվել է 1580 թ.): Ցեղասպանության տարիներին նրանց գերդաստանի մեծ մասը սպանվել է Դեր-Զորի ճանապարհին: Հրաշքով փրկվածների մեջ են եղել Արա Մելքոնյանի մայրն ու մորաքույրը: Անցնելով բազում փորձություններ՝ նրանք հաստատվել են Մեծ Բրիտանիայում, որտեղ էլ ծնվել և բնակվում է Արա Ստեփան Մելքոնյանը: Նրա ընտանիքի պատմությունը ներկայացված է այս տարվա ապրիլին Հայոց ցեղասպանության թանգարանում բացված «Հայոց ցեղասպանությունը վերապրածների ընտանիքների հետքերով» խորագրով ժամանակավոր ցուցադրության մեջ:
