30.07.2022


Հուլիսի 29-ին և 30-ին Հայոց ցեղասպանության թանգարան-ինստիտուտում տեղի ունեցավ «Հայոց ցեղասպանության թեմայի ուսուցում» խորագրով երկօրյա ամառային դպրոցը, որին մասնակցեց հայոց պատմության ավելի քան 30 ուսուցիչ Երևանից և մարզերից:

Արդեն չորրորդ տարին անցկացվող ամառային դպրոցի շրջանակներում այս տարի առաջին անգամ մասնակցած ուսուցիչների և ոլորտի մասնագետների մասնակցությամբ անցկացվեց երկու գործնական պարապմունք:

Ամառային դպրոցի մեկնարկը տրվեց ՀՑԹԻ տնօրեն, պ. գ. դ. Հարություն Մարությանի ողջույնի խոսքով, որում գլխավորապես շեշտվեց նման կրթական ծրագրերին ուսուցիչների մասնակցելու և ձեռքբերած գիտելիքներն ու հմտություններն աշակերտներին փոխանցելու կարևորությունը:

Առաջին օրվա դասախոսություններն էին․

● «Հայոց ցեղասպանության հուշահամալիրը և ապրիլքսանչորսյան ամենամյա երթերը» (ՀՑԹԻ տնօրեն, պ. գ. դ. Հարություն Մարության),
● Հայոց ցեղասպանության դասավանդում, հիմնավորում, նախադրյալներ, գործնական առաջարկներ (ցեղասպանագետ, գրքերի և դասագրքերի հեղինակ Ռուբինա Փիրումյան),
● Համատեքստի կարևորությունը պատմության ուսումնասիրության համար. Հայոց ցեղասպանության նախադրյալները և պատճառները (ՀՑԹԻ Համեմատական ցեղասպանգիտության բաժնի վարիչ, պ. գ. թ. Սուրեն Մանուկյան),
● Հայոց ցեղասպանության ժխտման թուրքական պետական քաղաքականության ակունքները (ԵՊՀ Արևելագիտության ֆակուլտետի դասախոս, պ. գ. թ. Մհեր Աբրահամյան),
● Հայոց ցեղասպանությունը թվերի լեզվով (ՀՑԹԻ Հուշագրությունների, վավերագրերի և մամուլի ուսումնասիրության բաժնի ավագ գիտաշխատող, պ. գ. թ. Ռոբերտ Թաթոյան),
● Պատմական ապրումակցումը և Ցեղասպանության թեմայի դասավանդումը. գիտագործնական պարապմունք (Ամերիկյան համալսարանի պրոֆեսոր, պատմության դասավանդման մասնագետ Զոհրաբ Գևորգյան):

Առաջին օրվա ավարտին մասնակիցները շրջեցին Հայոց ցեղասպանության թանգարանում, որտեղ ծանոթացան «Հայկական վարժարանների հետքերով. ուսյալ ազգի վկայագրերը» ժամանակավոր ցուցադրությանը՝ կազմող և համադրող Սեդա Պարսամյանի ուղեկցությամբ:

Երկրորդ օրվա դասախոսություններն էին․

● Հայոց ցեղասպանության ընթացքում կրոնի դերի ներկայացման մեթոդների շուրջ (ՀՑԹԻ Հայոց ցեղասպանության զոհերի փաստագրման և տվյալների հավաքագրման բաժնի վարիչ, պ. գ. թ. Շուշան Խաչատրյան),
● Դասավանդելով ոճրագործների մասին. անհրաժեշտությունը և մարտահրավերները (ՀՑԹԻ Համեմատական ցեղասպանագիտության բաժնի գիտաշխատող Ռեգինա Գալուստյան),
● Երեխաները՝ Հայոց ցեղասպանության թիրախում (ՀՑԹԻ գիտական քարտուղար, պ. գ. թ. Նարինե Մարգարյան),
● Անհատական պատմությունների դերը Հայոց ցեղասպանության թեմայի դասավանդման մեջ (ՀՑԹԻ կրթական ծրագրերի պատասխանատու, ՀՑԶՓ բաժնի կրտսեր գիտաշխատող Քրիստինե Նաջարյան),
● Քրիստոնյա այլ ժողովուրդների ցեղասպանություն (ՀՑԹԻ Հայոց ցեղասպանության զոհերի փաստագրման և տվյալների հավաքագրման բաժնի ավագ գիտաշխատող, պ. գ. թ. Թեհմինե Մարտոյան),
● Ցեղասպանության պատմության դասավանդումն ըստ վերջնարդյունքների («Կզնակ» հիմնադրամի կրթական նորարարությունների և հետազոտությունների վարչության պետ, ԵՊՀ դոցենտ, պ. գ. թ. Լիլիթ Մկրտչյան),
● Հայոց ցեղասպանության ուսուցման բազմատեսանկյուն մոտեցումը. գիտագործնական պարապմունք (Խ. Աբովյանի անվան հայկական պետական մանկավարժական համալսարանի դոցենտ, պ. գ. թ. Արմինե Եփրիկյան):

Յուրաքանչյուր բանախոսի ելույթին հաջորդեցին հարցուպատասխան և քննարկում:

Ուսուցիչներին տրվեցին գնահատման հարցաթերթիկներ, որի արդյունքները հաշվի կառնվեն՝ հետագա դասընթացներն առավել արդյունավետ դարձնելու համար:

Դասընթացի ավարտին ՀՑԹԻ տնօրեն Հարություն Մարությանը և կրթական ծրագրերի պատասխանատու Քրիստինե Նաջարյանը հավաստագրեր հանձնեցին ուսուցիչներին: Քրիստինե Նաջարյանը շնորհավորեց նրանց և շնորհակալություն հայտնեց ծրագրին դիմելու և մասնակցելու համար: Ուսուցիչներին նվիրեցին ՀՑԹԻ հրատարակած «Ցեղասպանագիտական հանդես» գիտական հանդեսի համարները:

Ամառային դպրոցի մասնակիցները երկրորդ օրվա ավարտին այցելեցին Հայոց ցեղասպանության հուշահամալիր, ծաղիկներ դրեցին անմար կրակի մոտ և մեկ րոպե լռությամբ հարգեցին Հայոց ցեղասպանության մեկուկես միլիոն անմեղ զոհերի հիշատակը: