Հոկտեմբերի 31-ին Հայոց ցեղասպանության թանգարան-ինստիտուտում տեղի ունեցավ «Հայրենիքից հեռու, հայրենիքում. հայ ռազմիկների ճակատագիրն Առաջին աշխարհամարտում» ժամանակավոր ցուցադրության փակման արարողությունը:

Ողջույնի խոսքով հանդես եկավ ՀՑԹԻ գիտական հարցերով փոխտնօրեն Էդիտա Գզոյանը, նա հույս հայտնեց, որ համագործակցությունն ավստրիացի հայագետի, ցուցադրության հեղինակ, Զալցբուրգի համալսարանի Քրիստոնյա Արևելքի հետազոտությունների կենտրոնի տնօրեն, դոկտոր-պրոֆեսոր Յասմին Դում-Թրագուտի հետ կլինի շարունակական:

Տիկին Գզոյանն Առաջին համաշխարհային պատերազմում հայերի մասնակցության ուսումնասիրության գործում ունեցած ավանդի և հայագիտության ոլորտում իրականացրած բազմամյա հետազոտության համար դոկտոր-պրոֆեսոր Յասմին Դում-Թրագուտին պարգևատրեց ՀՑԹԻ «Ավրորա Մարդիգանյան» հուշամեդալով: Յասմին Դում-Թրագուտը խոստովանեց, որ շատ հուզված է ու շոյված, պարգևն անսպասելի էր.

«Ես շատ շնորհակալ եմ ՀՑԹԻ անձնակազմին, տնօրինությանն իմ հետազոտության հանրայնացման համար հարթակ տրամադրելու, բոլոր հարցերում աջակցելու համար: Մի աչքս ուրախ է, որ ցուցադրությունը կայացավ, իսկ մյուսը լալիս է, որ այն փակվում է: Ժամանակավոր ցուցադրության համար տրված երկու ամիսն արագ անցավ: Ինչևէ, վստահ եմ, որ դեռ կաշխատենք միասին»:

Այնուհետև ներկաները հնարավորություն ունեցան դիտելու «Հայաստանի ճամփեքով. Յասմին Դում-Թրագուտ» փաստավավերագրական ֆիլմը: Ֆիլմը նվիրված է ավստրիացի հայագետի Հայաստանում իրականացրած հետազոտություններին, ռազմագերիների ընտանիքների հետ հանդիպումներին և այլն:

«Ես երեք լեզվի կրող եմ՝ գերմաներենն իմ մայրենի լեզուն է, անգլերենը՝ գիտական, իսկ հայերենը՝ սրտի: Ուստի թույլ տվեք դասախոսությունս կարդալ անգլերենով», -նշեց պրոֆեսորը և ներկայացրեց «Ռուդոլֆ Փյոխի փաստաթղթերը Առաջին աշխարհամարտի հայ ռազմագերիների վերաբերյալ. սոցիալ – ազգագրական հաղորդում» թեմայով դասախոսությունը:

Միջոցառման ավարտից հետո հյուրերը հնարավորություն ունեցան համտեսելու Յասմին Դում-Թրագուտի՝ Ավստրիայից բերած շոկոլադ և պանիր:




ՀՑԹԻ արտաքին կապերի և լրատվության բաժին