Հուլիսի 22, 2008թ.

Հանդիսավոր արարողություն` ի հիշատակ նորվեգուհի հայասեր Բոդիլ Բյորնի

2008 թ. հուլիսի 22-ին ժամը 10.40-ին Հայոց ցեղասպանության թանգարան-ինստիտուտի նախաձեռնությամբ տեղի է ունենալու նորվեգացի նշանավոր միսիոներուհի և հայասեր Բոդիլ Բյորնի գերեզմանից բերված հողի` Հայոց ցեղասպանության հուշահամալիրի Հուշապատի մեջ ամփոփման և հուշատախտակի տեղադրման հանդիսավոր արարողությունը:

Միջոցառման սկզբում ժամը 11.00-ին ՀՑԹԻ Կոմիտասի անվան դահլիճում տեղի կունենա «Նրանք ինձ կոչում էին մայրիկ» ֆիլմի ցուցադրությունը (ֆիլմն ընդգրկված է «Ոսկե ծիրան» կինոփառատոնի ֆիլմաշարում): Միջոցառմանը մասնակցելու համար Նորվեգիայից Հայաստան են ժամանել Բոդիլ Բյորնի ընտանիքի անդամները: Միջոցառումների շարքում ընդգրկված է Բոդիլ Բյորնի կողմից արված Արևմտյան Հայաստանի լուսանկարների ցուցադրություն` որոնք ընդգրկում են մինչև ցեղասպանությունը և ցեղասպանությունից հետո արված բացառիկ լուսանկարներ, նամակներ, օրագրեր և այլ փաստաթղթեր:

Ժամը 12.00-ին տեղի կունենա Հուշապատի մեջ Բոդիլ Բյորնի գերեզմանից բերված հողի ամփոփման արարողությունը:



Բոդիլ Բյորնը ծնվել է 1871 թ. Նորվեգիայի Կրագյորո քաղաքում:

1905թ «Կին միսիոներ աշխատողների» կազմակերպության կողմից գործուղվել է Օսմանյան կայսրություն` սկզբում Մեզրե, այնուհետև Մուշ, որտեղ նա աշխատել է այրիների և որբերի հետ: Եղել է Հայոց ցեղասպանության ականատես և լուսանկարել է դրա հետևանքները:

1917թ. վերադարձել է Նորվեգիա, սակայն շուտով մեկնել է նորաստեղծ Հայաստանի Հանրապետություն, որտեղ հիմնադրել է որբանոց: Հետագայում տեղափոխվել է Սիրիա, այդտեղ նույնպես հիմնել է որբանոց: Մինչև 1934թ. զբաղվել է որբախնամ գործունեությամբ, իր հատուկ ավանդը ներդնելով Եղեռնից մազապուրծ հայ որբերին օգնելու գործում:

Բոդիլ Բյորնը մահացել է 1960 թ.: